Stoðþjónusta

Farsæld barna

Öll börn eiga rétt á að blómstra og fá þá hjálp sem þau þurfa til að takast á við áskoranir lífsins. Farsældarlögin tryggja að þú og barnið þitt fáið aðgang að réttum stuðningi á réttum tíma.

Hvernig fær barnið mitt stuðning?

Það er einfalt að leita aðstoðar og þú þarft ekki að vera með lausnirnar á hreinu. Það er nóg að hafa áhyggjur eða spurningar.

Hafðu samband við tengilið farsældar í skólanum. Þú getur líka talað við annan starfsmann sem þú treystir, eins og umsjónarkennara eða deildarstjóra. Þau vísa þér áfram. 

Hvað gerir tengiliður farsældar?

Tengiliður farsældar er fyrsti snertiflötur þinn og stuðningur. Hlutverk hans er að hafa hag barnsins í forgrunni og vinna með ykkur.

• Hlustar á þig og veitir upplýsingar um þá þjónustu sem er í boði.
• Skipuleggur stuðninginn í samráði við þig og barnið.
• Hjálpar þér að koma málinu af stað og fá mat á þörfum barnsins.

Hvað gerist næst?

Eftir að þú hefur samband er þörf barnsins og fjölskyldunnar metin. Í skólunum starfa farsældarteymi þar sem koma saman tengiliður farsældar, umsjónarkennari og aðrir sérfræðingar eftir þörfum, til dæmis skólasálfræðingur.

Þið búið saman til áætlun um næstu skref. Áætlunin er svo endurmetin reglulega til að tryggja að hún skili árangri. Ef ekki, er ný leið fundin í sameiningu.

Nemendaverndarráð

Hlutverk nemendaverndarráðs er að taka við öllum erindum, bæði frá starfsfólki og foreldrum, um stuðningsþjónustu skólans og koma þeim í farveg sem leiðir til lausna á þeim.

Foreldrar sem telja að barn þeirra þurfi á stuðningi að halda geta haft samband við umsjónarkennara barns eða deildarstjóra sérkennslu, Helgu Helgadóttur. Foreldrum er alltaf tilkynnt ef málum barna þeirra er vísað til ráðsins. Ráðið heldur fundi vikulega.

Í ráðinu sitja:

• Skólastjórnandi
• Námsráðgjafi
• Hjúkrunarfræðingur
• Sálfræðingur
• Deildarstjórar

Umsjónarkennarar og aðrir eru boðaðir til fundar eftir þörfum. Ráðið er bundið þagnarskyldu um einkamál nemenda, að undanskildum atvikum sem ber að tilkynna samkvæmt lögum.

Heilsuvernd skólabarna í Skarðshlíðarskóla er á vegum Heilsugæslunnar í Firði. Heilsuverndin er hluti af heilsugæslunni og framhald af ung- og smábarnavernd. Markmiðið er að efla heilbrigði nemenda og stuðla að vellíðan þeirra. Starfsfólk heilsuverndar skólabarna vinnur í náinni samvinnu við foreldra, skólastjórnendur, kennara og aðra sem koma að málefnum nemenda með velferð þeirra að leiðarljósi.

Þjónusta heilsuverndar skólabarna er skráð í rafræna sjúkraskrá heilsugæslunnar. Farið er með allar upplýsingar sem trúnaðarmál.

Helstu áherslur í heilsuvernd nemenda eru:

• Fræðsla, forvarnir og heilsuefling
• Bólusetningar
• Skimanir
• Viðtöl um heilsu og líðan

Unnið er samkvæmt leiðbeiningum Þróunarmiðstöðvar íslenskrar heilsugæslu og Embættis landlæknis um heilsuvernd grunnskólabarna. Sjá nánar á vef Heilsugæslu höfuðborgarsvæðisins.

Heilbrigðisfræðsla

Skipulögð heilbrigðisfræðsla er veitt í öllum árgöngum og er áherslan á að hvetja til heilbrigðra lífshátta. Eftir fræðslu fá foreldrar upplýsingar í tölvupósti um fræðsluna og gefst þá kostur á að ræða við börnin um það sem þau lærðu og hvernig hægt er að nýta það í daglegu lífi.

Markmið hverrar fræðslu eftir árgöngum er hægt að sjá á Heilsuveru.

Skimanir

Skimað er fyrir ákveðnum heilbrigðisvandamálum í 1., 4., 7. og 9. bekk. Þær felast í mælingu á hæð, þyngd og sjónskerpu. Nemendur í öðrum árgöngum eru skimaðir eftir þörfum. Ef frávik reynist í skimun er haft samband við forsjáraðila.

Heilsueflandi viðtöl um lífsvenjur og líðan

Þegar skimanir fara fram í 1., 4., 7. og 9. bekk ræðir skólahjúkrunarfræðingur við nemendur um líðan og lífsvenjur. Markmið viðtalanna er að styrkja vitund nemenda um eigið heilbrigði og líðan. Ef vart verður við vanlíðan eða áhyggjur er gripið til úrræða.

Bólusetningar

Bólusetningum er ætlað að verja einstaklinginn gegn alvarlegum smitsjúkdómum. Í 7. bekk er bólusett við mislingum, hettusótt og rauðum hundum (1 sprauta) og HPV (Human papilloma veirum) sem geta valdið leghálskrabbameini. HPV-bólusetning er gefin tvisvar með 6 mánaða millibili. Í 9. bekk er bólusett við barnaveiki, stífkrampa, kíghósta og mænusótt (ein sprauta).

Fyrir bólusetningu fá foreldrar tölvupóst með upplýsingum um tímasetningu. Það er á ábyrgð foreldra að láta bólusetja börn sín. Gott er að nemendur komi með bólusetningarskírteini sín í skólann þegar bólusetning fer fram.

Hafið samband við skólahjúkrunarfræðing ef:

• talið er að barn sé ekki að fullu bólusett
• óskað er eftir því að barn sé ekki bólusett
• nánari upplýsinga er óskað

Sjá meira um bólusetningar

Veikindi og slys

Ef óhapp eða slys verður á skólatíma sér starfsfólk skólans um fyrstu hjálp. Þurfi nemandi að fara á heilsugæsluna eða slysadeild skulu foreldrar fara með barninu. Því er mikilvægt að skólinn hafi öll símanúmer þar sem hægt er að ná í þá á skólatíma barnsins. Ekki er ætlast til að óhöppum sem gerast utan skólatíma sé sinnt af heilsuvernd skólabarna.

Langveik börn

Mikilvægt er að skólahjúkrunarfræðingur viti af börnum sem eru með fötlun eða langvinnan eða alvarlegan sjúkdóm, til dæmis sykursýki, ofnæmi, flogaveiki, blæðingarsjúkdóma eða aðra alvarlega sjúkdóma. Hlutverk skólahjúkrunarfræðingsins er að skapa þessum börnum viðeigandi aðstæður og umönnun í skólanum í samvinnu við foreldra og starfsfólk skólans.

Lyfjagjafir

Samkvæmt tilmælum landlæknis um lyfjagjafir í grunnskólum eru sérstakar vinnureglur varðandi lyfjagjafir til nemenda á skólatíma.

Höfuðlús

Höfuðlús birtist reglulega í skólum landsins og er mikilvægt að foreldrar kembi hár barna sinna reglulega yfir skólaárið. Rétt er að láta skólann vita ef lús finnst í hári barns og skólahjúkrunarfræðingur getur leiðbeint varðandi lúsasmit.

Sérkennsla er sérstakur stuðningur fyrir nemendur með sértæka námserfiðleika, fötlun, lesblindu (dyslexíu) eða grun um lesblindu. Sérkennslan fer fram annað hvort inni í bekk eða litlum hópi utan bekkjar.

Margir nemendur sem eru í sérkennslu vinna eftir bekkjarnámskrá og með námsefni bekkjar en aðrir vinna eftir einstaklingsmarkmiðum og þurfa aðlagað námsefni og námsaðstæður. Gerðar eru námsáætlanir fyrir hópa eða einstakling þar sem fram koma upplýsingar um stöðu nemenda, markmið kennslunnar, leiðir og mat.

Sérkennslan er skipulögð til lengri eða skemmri tíma og þörf nemandans fyrir sérkennslu er reglulega endurmetin. Mikil áhersla er lögð á góða samvinnu milli heimila, umsjónarkennara og sérkennara.

Íslenska sem annað tungumál

Nemendur með íslensku sem annað tungumál fá sérstuðning í íslenskukennslu á meðan þess er þörf. Þeir geta fengið undanþágu frá skyldunámi í dönsku og fengið í staðinn aukinn stuðning í íslensku, öðrum námsgreinum eða fengið metið nám á eigin tungumáli. Kennslan getur farið fram með eða án stuðnings í almennum bekk, sérkennslu í litlum hópi eða einstaklingskennslu utan bekkjar í námsverinu Veröld.

Sálfræðingur starfar í öllum grunnskólum bæjarins. Sálfræðingur skólans sinnir greiningu, fræðslu, stuðningi og ráðgjöf en ekki meðferð. Tilvísanir til sálfræðings berast í gegnum nemendaverndarráð eða brúarteymi grunnskólans. Samþykki foreldra verður alltaf að liggja fyrir. Tilefni beiðna geta verið margvísleg en áhersla er lögð á snemmtækt mat og greiningu á stöðu nemanda vegna náms, hegðunar og sálrænna erfiðleika.

Talmeinaþjónusta

Börn sem glíma við frávik í máli eða tali eiga rétt á greiningu talmeinafræðings ásamt sérkennslu og stuðningi við nám í grunnskóla. Talmeinafræðingur veitir einnig ráðgjöf til starfsfólks grunnskóla. Foreldrar geta óskað eftir greiningu og ráðgjöf talmeinafræðings, í öllum tilvikum þarf skriflegt samþykki foreldra að liggja fyrir áður en greining fer fram.